Jharkhand Rajya Sabha Chunav: 56 mein se 6 vote gayab, mahagathbandhan mein badha tanav

Rajya Sabha chunav ke baad badh gaya mahagathbandhan mein kalesh

Jharkhand mein Rajya Sabha chunav ke natije aane ke baad mahagathbandhan ke andar siyasi bhuchal aa gaya hai. Haalanki chunav prakriya samapt ho chuki hai, lekin Congress, RJD aur JMM ke beech aarop aur pratyarop ka daur ab khulkar samne aa gaya hai. Sabse bada sawal ye hai ki 56 mein se 6 vidhayakon ke vote aakhir kahan gaye. Yah mamla ab sirf ek seat ki haar ka nahi, balki gathbandhan ke bharose aur future ka ban gaya hai.

JMM ne maangi gambhir samiksha

JMM ke pradesh mahasachiv Vinod Pandey ne is poore ghatnakram par chinta jatayi hai. Unka kehna hai ki jo kuch bhi chunav ke dauran hua, uski gambhir samiksha honi behad zaroori hai. JMM ne gathbandhan ke top leaders se ek baithak bulane ki maang ki hai taaki aisi sthiti dobara na bane. JMM ne spasht kiya hai ki agar kisi vidhayak ki bhumika sandigdh payi gayi, to uske khilaf sakht kadam uthaye jayenge. Halanki, JMM ka maanana hai ki is vivad se sarkar par koi khatra nahi hai.

Congress ne kiya apne vidhayakon ka bachav

Rajya Sabha chunav mein haar ke baad Congress ne apne sabhi vidhayakon ko party office bulakar ekjutata dikhane ki koshish ki. Saturday ko hui press conference mein 16 mein se 13 vidhayak maujood rahe. Congress ne daava kiya hai ki unke vidhayakon ne party prabhari ko matpatra dikhakar hi vote dala tha. Pradesh adhyaksh Keshav Mahto Kamlesh ne kaha ki RJD dwara lagaye gaye aarop puri tarah se niradhar hain.

• Congress ka kehna hai ki haar ke bawajood vidhayakon ki nishtha par sawal uthana galat hai.
• Congress vidhayak dal ke neta Pradeep Yadav ne BJP par horse trading ka aarop lagaya hai.
• Congress netaon ne party prabhari K Raju ka bachav karte hue kaha ki unke anubhav par sawal nahi uthaye ja sakte.
• Mantri Radhakrishna Kishore ne mana ki 56 vote hone ke bawajood haar hona ek chook hai jiska vishleshan central leadership kar rahi hai.

Sarkar par sankat se kiya inkar

Halanki gathbandhan ke teeno dalon ke beech kafi tanav dikh raha hai, lekin kisi ne bhi filhal sarkar girne jaisi koi baat nahi kahi hai. Sabhi dalon ne alag-alag bhavnaye vyakt ki hain, jahan ek taraf Congress apne vidhayakon ko sambhalne mein lagi hai, wahi RJD aur Congress ek dusre par sawal utha rahe hain. JMM ab gathbandhan ki chhavi sudharne ke liye samiksha ki baat kar raha hai. Yeh dekhna dilchasp hoga ki aane wale samay mein gathbandhan ka bharosa kaise bahal hota hai.